Höfundur : Trausti Þór Jóhannsson, skrifað about 1 month
Þessi spurning er spurð í hvert skipti sem ég hitti fólk sem enn býr á Íslandi. Þetta er frekar stór spurning því ég veit ekki svarið.
Það er mjög margt sem kemur inn í þetta. Ef við byrjum á því yfirborðskennda, húsið okkar. Við erum búin að búa í þessu húsi í 8 ár, við erum búin að endurbyggja það að innan, taka það alveg í gegn. Það má alltaf segja að þvottahúsið eða herbergin séu eftir, þessi eltingaleikur klárast aldrei. Það er búið að búa til fallegan pall úti. Við erum búin að koma hlutunum fyrir eins og við viljum.
Svo má taka það fjárhagslega. Við erum með húsa lán sem greiðist jafnt og þétt niður um þá upphæð sem greidd er inn á lánið. Lánið er með undir 5% vöxtum. Þegar húsið hækkar í verði, þá lækka lánin.
Þetta er mjög góður kostur að eiga við. Hérna sveiflast hlutirnir ekkert.
En svo er það tengingar hlutinn. Það er eitthvað við þetta sker út í ballarhafi. Það er eitthvað sem tengir mann. Er það vonda veðrið ? Rokið ? Snjórinn ? Kannski eitthvað af þessu sem gerir það að verkum að maður fær tilfinninguna að maður sé heima. Svo er það ættin. Bæði ég og Elsa Þóra eigum svakalega stóra fjölskyldu, uppfullu af góðu fólki.
Við vorum í heimsókn hjá Hafrúnu og Kristjáni. Stelpurnar okkar neita núna að fara aftur til Noregs nema Hafþór komi örugglega í heimsókn því hann sé svo skemmtilegur.
Auðvitað missir maður úr við að búa svo langt frá öllum ættingjum. Það er heil kynslóð sem maður þekkir varla sem er að rísa upp. Einstaklingar sem voru börn þegar maður flutti út og eru núna jafnvel að flytja að heiman.
Svo það veraldlega. Hvað á maður að vinna við ? Ég hef verið ákaflega heppinn í útlöndum, ég hef bara unnið við það sem er skemmtilegt. Ég hef getað unnið við tækni sem er hreinlega ekki í notkun á Íslandi. Það eru ákveðnir hlutir sem mig langar ekkert að vinna með og nær eingöngu er það þessir hlutir sem eru í notkun. Það er líka hægt að vinna í útlöndum og búa á skerinu. Ég þekki nokkra sem gera slíkt. Þetta er ákaflega þreytandi og maður er hreinlega aldrei heima hjá sér og er lengi í burtu í einu. Svo má ekki gleyma smæð markaðarins. Það er ekki mikið í boði. Eftirspurnin er meiri en framboðið. En er skemmtilegt í boði ? Ég hreinlega veit það ekki. Manni finnst þetta vera mikið af því sama og árið 2000 þegar maður flutti út vegna þess að umhverfið var mjög svo óspennandi.
Ég get ekki neitað að það er eitthvað sem togar í mig, það er eitthvað sem segir manni að maður sé búinn að vera nógu lengi í burtu.
Kannski er það bara eitthvað flökkueðli í manni sem segir að maður sé búinn að vera nógu lengi í Noregi en er ekkert að segja manni að fara heim aftur. Heimurinn er stór og maður er ekki að yngjast.
Ég held að það eina sem maður getur sagt í þessu er
Ég hreinlega veit ekki
Vala
about 1 month
Ég veit, ég veit;)
